മുന്‍ ഇന്ത്യന്‍ ഓള്‍റൗണ്ടര്‍ യുവരാജ് സിങ് താന്‍ നേടിയ 12 പന്തിലെ അര്‍ധ സെഞ്ചുറിയുടെ റെക്കോര്‍ഡ് ഓര്‍മ്മിപ്പിച്ചുകൊണ്ട് നടത്തിയ കുസൃതി നിറഞ്ഞ പരിഹാസത്തിന് രസകരമായ മറുപടിയുമായി യുവ ഓപ്പണര്‍ അഭിഷേക് ശര്‍മ. ചൊവ്വാഴ്ച വെല്ലിംഗ്ടണില്‍ ന്യൂസീലന്‍ഡിനെതിരായ മൂന്നാം ടി20യില്‍ തകര്‍പ്പന്‍ സെഞ്ചുറി നേടിയതിന് പിന്നാലെയാണ് തന്റെ ഉപദേഷ്ടാവ് കൂടിയായ യുവരാജ് സിങ്ങിന് അഭിഷേക് മറുപടി നല്‍കിയത്.
വെറും 12 പന്തില്‍ 50 റണ്‍സ് അടിക്കുക എന്നത് വളരെ പ്രയാസകരമായ കാര്യമാണെന്ന് സമ്മതിച്ച അഭിഷേക്, 2007-ല്‍ യുവരാജ് കളിച്ച അന്തരീക്ഷത്തെക്കുറിച്ചും ഓര്‍മ്മിപ്പിച്ചു. മത്സരവിജയത്തിന് അഭിഷേകിനെ അഭിനന്ദിച്ച യുവരാജ്, 12 പന്തില്‍ അര്‍ധ സെഞ്ചുറി തികച്ച തന്റെ സ്വന്തം റെക്കോര്‍ഡിന്റെ കാര്യം ഓര്‍മ്മിപ്പിക്കാന്‍ മറന്നില്ല. എന്നാല്‍ ഈ പ്രസ്താവനയെ ചിരിച്ചു തള്ളിയ അഭിഷേക്, എന്തുകൊണ്ടാണ് അത്തരം ഒരു നേട്ടം കൈവരിക്കാന്‍ എളുപ്പമല്ലാത്തതെന്ന് വ്യക്തമാക്കി.
'ഞാന്‍ ഇത് ഇതിനുമുമ്പും പറഞ്ഞിട്ടുണ്ട്. ആ സമയത്ത് അദ്ദേഹം ഏത് തരത്തിലുള്ള ക്രിക്കറ്റാണ് കളിച്ചിരുന്നതെന്ന് എനിക്കറിയില്ല, പക്ഷേ അത് എളുപ്പമുള്ള കാര്യമേയല്ല. ഏതൊരു ബാറ്ററും കളത്തിലിറങ്ങി അങ്ങനെ അടിച്ചുതകര്‍ക്കാന്‍ ആഗ്രഹിച്ചാലും അത് ഒട്ടും എളുപ്പമല്ല. 12 പന്തില്‍ 50 റണ്‍സ് അടിക്കാന്‍ ആര്‍ക്കും അത്ര എളുപ്പത്തില്‍ സാധിക്കില്ല. അത് വല്ലപ്പോഴും മാത്രം സംഭവിക്കുന്ന ഒന്നാണ്' -അഭിഷേക് വ്യക്തമാക്കി.
2007-ല്‍ ഡര്‍ബനില്‍ നടന്ന ടി20 ലോകകപ്പില്‍ ഇംഗ്ലണ്ടിനെതിരെ സ്റ്റുവര്‍ട്ട് ബ്രോഡിന്റെ ഓവറില്‍ ആറ് സിക്‌സറുകള്‍ ഉള്‍പ്പെടെ 12 പന്തില്‍ അര്‍ദ്ധസെഞ്ചുറി തികച്ചാണ് യുവരാജ് ചരിത്രം കുറിച്ചത്. പിന്നീട് 2023-ല്‍ മംഗോളിയയ്ക്കെതിരെ 9 പന്തില്‍ അര്‍ധ സെഞ്ചുറി നേടി നേപ്പാളിന്റെ ദിപേന്ദ്ര സിംഗ് ഐറി ഈ റെക്കോര്‍ഡ് തകര്‍ത്തിരുന്നു. നിലവില്‍ മികച്ച ഫോമിലാണ് അഭിഷേക് ശര്‍മ്മ. ന്യൂസിലാന്‍ഡിനെതിരെ 35 പന്തില്‍ നിന്ന് നേടിയ സെഞ്ചുറിയുടെ മികവില്‍ 199 റണ്‍സ് ലക്ഷ്യം 40 പന്തുകള്‍ ബാക്കിനില്‍ക്കെ 6 വിക്കറ്റിന് മറികടക്കാന്‍ ഇന്ത്യക്ക് സാധിച്ചു.
വ്യക്തിഗത നാഴികക്കല്ലുകള്‍ കൈവരിക്കുന്നതിലല്ല താനും 15-കാരനായ കൂട്ടാളി വൈഭവ് സൂര്യവംശിയും ശ്രദ്ധ കേന്ദ്രീകരിച്ചതെന്ന് അഭിഷേക് പറഞ്ഞു. ടീമിന് മികച്ച തുടക്കം നല്‍കുകയും പവര്‍പ്ലേയില്‍ ന്യൂസിലാന്‍ഡിനെ സമ്മര്‍ദ്ദത്തിലാക്കുകയുമായിരുന്നു തങ്ങളുടെ മുന്‍ഗണന. 'ഒരു ബാറ്റര്‍ എന്ന നിലയില്‍ ഞങ്ങള്‍ അത്തരം നാഴികക്കല്ലുകള്‍ക്ക് പിന്നാലെ പോകാറില്ല. ടീമിനായി മത്സരങ്ങള്‍ ജയിക്കുക എന്നതാണ് എപ്പോഴും ഞങ്ങളുടെ ലക്ഷ്യം, പ്രത്യേകിച്ച് വൈഭവ്. അവന്‍ ഇവിടെയുണ്ട്. അതിനാല്‍ ഇതായിരുന്നു ഞങ്ങളുടെ പ്ലാന്‍, പരമ്പരയിലുടനീളം ഇതേ ശൈലി തുടരാനാണ് ഞങ്ങള്‍ ആഗ്രഹിക്കുന്നത്. അത് വളരെ നന്നായി വന്നു' -അദ്ദേഹം കൂട്ടിച്ചേര്‍ത്തു.
ഓപ്പണിംഗ് സഖ്യം വെറും 7.1 ഓവറില്‍ 133 റണ്‍സിന്റെ കൂട്ടുകെട്ട് പടുത്തുയര്‍ത്തി ഇന്ത്യയെ മികച്ച നിലയിലെത്തിച്ചു. സൂര്യവംശി 19 പന്തില്‍ 45 റണ്‍സും, 11 സിക്‌സറുകളും 9 ഫോറുകളും അടക്കം അഭിഷേക് 35 പന്തില്‍ 113 റണ്‍സും നേടി. മൂന്നാം ടി20യിലെ 6 വിക്കറ്റ് വിജയത്തോടെ അഞ്ച് മത്സരങ്ങളുടെ പരമ്പരയില്‍ ഇന്ത്യ 3-0 ന്റെ അജയ്യമായ ലീഡ് സ്വന്തമാക്കി. ആദ്യ രണ്ട് മത്സരങ്ങളിലും 4 വിക്കറ്റുകള്‍ക്കായിരുന്നു ഇന്ത്യയുടെ വിജയം. പരമ്പര വിജയം ഉറപ്പിച്ച ഇന്ത്യ, ശേഷിക്കുന്ന രണ്ട് മത്സരങ്ങളിലും വിജയം തുടരാനാണ് ലക്ഷ്യമിടുന്നത്. നാലാം ടി20 വെള്ളിയാഴ്ച ഓക്ക്ലന്‍ഡിലെ ഈഡന്‍ പാര്‍ക്കിലും, അഞ്ചാമത്തെയും അവസാനത്തെയും മത്സരം ഞായറാഴ്ച ഹാമില്‍ട്ടണിലെ സെഡണ്‍ പാര്‍ക്കിലും നടക്കും.
content highlights: 'It's Not Easy Being Like Yuvraj': Abhishek Sharma Reflects After Record Century